2026年6月24日 星期三

脫節 + 敬畏市場


現時有問題走去問ai真係好方便,好快就幫你解答問題,至於答案使唔使fact check就自己判斷.

遲啲簡單化AI Agent,就可能成為分水嶺,一批人試下無妨,另一批怕死唔敢用或者唔識用.


在工作上就會越拉越大距離,競爭力不夠就會被淘汰.不會使用將會狠狠地拋離.

在投資方面,以一個收息佬嚟講,就一向都脫節.什麼主題股,爆升股都唔關佢事,相對可以避開割韭菜.

如果用開槓桿現時真係要小心,如果搞到輸凸咗就真係冇仇報.自己睇路.

使用槓桿贏開唔多覺就會越做越大,但一反轉就.........

都係嗰句保持一顆謙卑的心!!


另外就係今日收到中移動股息,提前一期完成第3個100萬.啲股息又會好快再入返股市,等9月再收多一次息.不停滾存,就會越滾越多越滾越大.

下一個目標就係每年50,60萬股息收入.


美日韓台升到飛天,但又要睇埋匯率.港股獨憔悴,食住花生等睇最燦爛的煙花.

人哋有本事賺錢,夠膽大注同揸得實,又或者以小博大,自己就唔好盲衝入去,因為好多時風險就喺頭殼頂.

股神拍檔查理芒格講過妒忌是最愚蠢的行為.它是唯一一種「當事人無法從中得到任何樂趣」的罪行,只會帶來痛苦和折磨。

投資都係最老土嗰句量力而為......小心!!





2025年12月20日 星期六

調節

年紀大機器壞

好多小毛病排住隊出現,搞到心情低落,連投資都沒有興趣.

為避免做錯決定,需要停一停休息一下,暫停投機.

不過手痕症經常發作,有心情時考下眼光止痕.


另外就係要留返個錢旁身,之前沒有預備醫療費用同維修費這些項目,現時都要加落去備用開支上.

費事有乜意外唔夠錢找數就麻煩.(盡可能都唔想被迫沽出股票)

下年收到嘅股息未必可以全程投入於股市,減少複利效果.


意外同明天....

人在天堂錢在....

洗咗嘅錢先係自己嘅.


每個年齡層都應該做適合自己嘅嘢先開心.

自己會唔會錯過冇做嘅嘢...

唔可以不斷後悔之前冇做嘅嘢...


以前有漫畫睇已經很開心,現時睇漫畫都係擸一眼就算,真正吸引到我嘅已經好少.

之後賺到錢先至覺得開心?

再之後是否身體健康先至開心??


平平淡淡冇事發生悶悶過日子先至最好.



2025年6月1日 星期日

屎忽痕坐唔定,做咗傻仔賺少好多

操作檢討


今集主角 :1686 新意網


之前股票大執倉唯一死淨種就係新意網,留有倉底貨. 之後用收到嘅股息補回有凸.

之後都冇乜特別,但在上年十月頭佢變咗幫人補血,唔知點解就挑起條筋,心知不妙,真係唔好唔信邪, 加上自己強迫症發作,一直計劃27年前將中移動股數存夠齊頭數,以單純收股息角度7厘以下中移動不算吸引, 結果提前收集齊股數. 


自己心想新意網個巨無霸起碼要一年半載先完成 , 要有好消息發酵都不是短時間可以發生, 今年收到股息再入返新意網都仲有大把時間,所以就換入941. 點知就係deepseek出現 ,股價爆升.其實當時可以五個幾反手入返貨. 但個腦裏面根本沒有這個選擇.又一次證明自己係一個習慣左側交易,完全沒有破位高追嘅想法, 如果唔習慣硬食股價下跌,左側交易好易死喺山腰. 趁勢追貨這個動作未必適合自己,但可以考慮以細注嘗試效果未必有用.



今次要拎出嚟鞭屍同貼堂 捉到鹿唔識脫角錯失機會 

擦身而過!!!

雖然賺少咗但自己提早完成股數達標又係另一份滿足感. 我都係感性行先.



沽貨都要齊頭數


另外就係短炒操作,賺一千幾百就會心郁郁沽貨獲利.完全冇大志,以我現時倉位,每日上落十萬八萬係好正常. 根本唔會去計較, 但一放落短炒到就係另一個世界 ,這些應該係投資心理帳戶作怪, 所以我會創造多一個增值帳戶,加入更多條件來進行操作,例如持股要最少半年,獲利至少兩成以上先可以沽貨. 睇下可唔可以增加獲利空間. 減少短炒動作 .



騰訊同港交所都只係贏粒糖冇食到大浪,計落不合符盈虧比!一定要檢討!!


收息帳戶: 保證現金流細水長流 

增值帳戶: 提升資產,低位收集大大隻有實力公司.要揸實一年半載.

短炒帳戶:考眼光止手痕,當投注玩遊戲賺餐茶錢,小注碼.

希望在自己腦海裏面分清這三個帳戶,加多啲限制條件,使成果可以提升. 


至於實體方面就梗係開多個證券帳戶,其實5,6年前已經想開, 不過覺得入金出金麻煩,拖拖下冇咗件事 .

有多個戶口分配資金時已經可以分開操作調配更方便. 

今次會實行股票期權操作,可以學多樣嘢,用多啲腦,睇下啱唔啱自己用, 投資學多樣工具,真係可以用到90歲,識多樣嘢無妨. 細細注執返兩舊水,當幫補下轉倉費,最緊要熟習介面操作,唔好戇居居撳錯掣.月尾先有子彈,七月初就可以上戰場.


至於中移動,已經收集齊心目中股數, 可以將他封印到2027年 ,冇乜重大事件都唔會理佢. 之前提到市場給予13~15倍PE好合理,結果兩個細佬一支箭跑出移動就喺公園散步.今次都為移動打打氣, 過多兩年市場覺得移動係一隻公用科技股給予20倍PE.到時股價HK$150.純屬個人信仰價. 最怕就係三兄弟內卷卷死自己!好在最近又升返上接近90,都有返啲安慰.


就係為咗提早攞呢張有簽名有印花的牆紙

亦都好感恩有機會可以檢視自己,令自己可以更加進步!




2024年12月1日 星期日

你而家無......但係將來會有!!

之前港股大升,相信不少朋友股票倉都回血不少,雖然之後回落返曬,不過身手靈活嘅朋友就搵到食,我自己個倉就比較平淡.

現時消費降級市道低迷.如果有返一份被動收入相信個心都會安定啲.所以一定要儲錢,學習投資,儲返一些收息股幫補家用.

可能大家唔相信,其實我之前啲人工都係得萬幾蚊,都未試過有兩萬,但係每年儲下股票,人工同股息再投入複式滾存,存到今時今日竟然可以突破月入三萬股息.可見錢搵錢嘅威力, 有資產同用勞力的分別. 

所以大家不要失去希望更加不應躺平. 將來老咗要靠乜嘢維持生存? 現在應該踏出第一步,慢慢存股,日積月累就一定會見到成果.千萬不要同人對比, 更加唔好羨慕其他人,我自己就永遠揸唔實啲波幅大又冇乜股息的股票, 有得賺就食咗先,有好多錢係你自己冇本事賺.要一步步行返自己嘅步伐同方向.我知心態上係好難,所以成功永遠都係少數,個個得就走曬去炒股搵鬼做打工仔. 

一早儲定啲資產,如果被迫退休都冇咁徬徨, 及早為退休財務做準備,時間唔等人, 過多幾年你就一定做唔切,到時就真係唔知點死. 得閒自己可以計下條死數,冇事冇幹可以存幾多錢,存足十年嗰筆錢可以產生幾多現金流畀你? 10年唔夠....15年....20年..... 自己慢慢計.......


提升財商係好重要好重要一環,在設定理財目標後,持續地學習與實踐.

越早學習投資理財對自己將來退休越有幫助, 唔好搞到晚景淒涼. 


最後好老土都要講句,真係要相信”積少成多...滴水成流...(現金流)”的道理.


窮人,中產,富人的現金流向

圖片來源:貝蒂的看書輕生活




















































【富爸爸窮爸爸】現金流圖表

簡簡單單四個格仔加幾個箭咀,就已經打開咗我個投資世界.

學生時期睇<大時代>留下嘅印象係炒股票會輸死人,仲要搞到去跳樓.一直覺得股票很危險........所以當初冇投資概念,只懂得做定期存款.
最初聽到呢個書名仲以為係畀新手父母嘅育兒書就冇為意,結果浪費咗好多年時間先知道係關於理財投資,如果可以早多幾年投資唔知結果又會係點 …….
所以正確對事物嘅認知係好重要.....吸收咗錯誤資訊真係影響深遠.

好多嘢都係講緣份, 如果年青時睇這本書可能唔入腦...成熟啲睇又可能另一番滋味... 就睇自己幾時先醒覺.

祝有緣人可以慢慢財務自由 !!





2023年9月25日 星期一

存股複利--收息200萬 投資機遇 把握機會

收股息HK$2,000,000.00有好多個零.一睇就知係標題黨.為咗吸引人眼球.但是最重要的東西未寫落去就是............時間值. 


重要聲明:本文章不是投資建議。


記得之前一篇文章寫存股12年,由零開始跌跌撞撞,尋找適合自己嘅投資方法.

收股息累計第一個100萬真係好艱辛漫長.要用12年時間真係唔係講笑.

至於第二個100萬我用4年時間完成目標.股息再投入複利威力!持續投資,複利效果明顯.時間大大縮短.

至於第三個100萬,我相信正路三年時間完成,不過將來嘅嘢冇人知,加上我自己會不斷修改自己嘅投資技巧,要完成任務就要由時間證明.


 睇到呢度我相信部分人都會講"大佬...要用十幾廿年時間去存股要等好耐,最重要係唔知work唔work,你得人哋未必得,今時唔同往日,個世界唔同曬......" 我只係想講想要完成自己嘅目標就一定要行出第一步,盡力嘗試過已經足夠,好多時要接受天意同緣分,選擇一條適合自己嘅道路前進,賺錢有好多方法等你嘗試. 我就選擇咗股票,因為係入場門檻低同比較公平的平台,不用靠人靠關係高學歷,只要你儲到錢就可以進行交易.自己話事得失都係自己受.成功與否全靠自己!! 


 每個人嘅財務規劃都不同,我就已存股嘅方式進行,大家可以為自己設定一個目標,例如要存十幾萬比較高息股票,為自己每月加薪一千元,對沒有儲錢習慣同月光族可能比較困難,要預咗用4~5年時間先可以初見成效,總好過等你老細加你人工,不過大家在投資之前要多吸收財經知識,投資理念多睇理財書籍,多方面嘗試尋找自己適合嘅方向,要親身落場砌過先至知道自己嘅心理質素,其他人係幫唔到你.越早投資越好,趁住資金小開始投資就算做錯損失有限,唔好等到攞退休金嗰陣時先至嚟投資,到時可能死得好慘!萬事起頭難就睇你堅唔堅持到,最重要秘訣就係"應慳則慳" 


 開頭你唔慳係唔會有資本投資.每日慳一杯貴價咖啡唔飲廢水戒食煙.....個腦不停想著消費消費消費.......唔好浪費啲冤枉錢.睇到呢度我相信又有大部分人會講"大佬要做苦行僧好慘啫...人生仲有乜樂趣呀...冇曬娛樂消遣....."慳嗰幾十蚊冇乜作用,但我會覺得係思想同態度,進而改變行為同結果.當然又唔可以虐待自己, 有啲嘢要取得平衡生活至可以過得開心. 消費都可以分多與少,層次高低的分別. 


 有陣時真係要犧牲一啲嘢呢換取另一啲嘢, 就睇你願唔願意嘗試. 


 大多數人總沒有毅力及對長遠會有好結果的信心. 


 至於操作方面,貪婪戰勝一切,完全K.O.昨日的我.原本想一動不如一靜,結果話口未完大跌到萬四點之後又反彈,觸發我不得不檢討股票倉,結果一不做二不休,將存咗4~5年嘅股票絕大部分換曬主力股,結果變成萬劍歸宗.連我自己都估唔到我咁做!原來自己團火仲未熄,更加想知道自己的邊界可以去到多遠!好想挑戰下自己!絕對唔係衝動! 


重要提示 

本文不鼓勵投資者一注獨贏.因為風險極高有機會虧蝕全數本金,請投資前做好風險評估. 尤其心理壓力方面.


 今次嘅股票操作足以改變我下半生,大家聽起上嚟可能覺得好誇張,現時攞部手機出嚟撳幾個掣就可以立即變現金或換股 ,但對於我精神層面又係另一回事,今次作出咁激進嘅行動, 是因為我真係看到機會,第二就係有能力捉實這個機會,第三係我擁有可以接近100%出盡全力擁抱這個機會的決心. 另外就係後悔嘅程度,有做比冇做好,自己相信嘅機會而不全力去做一定會好後悔......


 就算下次再有機會都冇可能出盡全力.因為今次我覺得風險不算高,內心完全冇賭博成分.自己完成操作之後亦冇多大壓力,仍然可以好輕鬆咁面對股價升跌, 可以講話心情好平靜.當然亦有想過如果係悲劇收場會有什麼結果,會否變成一無所有.成為反面教材. 到時大家不用嚟安慰我,因為我是自己攞嚟衰......


 至於風險方面.最大嘅風險就係自己,就好似過馬路行前多一步就係天堂與地獄嘅分別,風險無處不在.其次就係政策同任務,只要把它當成權利和義務感覺上會舒服啲.要有番咁強嘅食力先至可以哽得落.企業賺唔到錢點出手幫拖. 


 這樣操作並非因為"中特估"盲目追加,而是因為企業明確的派息政策,表明三年內派息比率上升到70%以上.當時睇到這則新聞已經兩眼發光,睇見估值真係好抵買,開始進行收集變成主力股,但開頭係半信半疑中入貨,之後檢討全倉股票的盈利能力同股息成長性作比較,就行出這一步.開頭用現金入貨就好順利,但之後要以股換股就比較糾結, 就係儲開有感情,結果拖慢進度,就係唔夠狠心沽貨,賣仔莫摸頭....搞到3月先至最後完成 . 其實臨尾是有少少唔爭在同唔志在的心態.大家千祈不要學.


 只要可以派息維持HK$5左右,就已經好滿意.揸實唔放5年就可以收回一半成本.到時計落自己收到嘅股息率就高達20厘. 你話爽唔爽. 加上2027年可能仲有驚喜.點睇都係穩守突擊揸得安心.當然要睇實佢嘅股息政策,有乜風吹草動都會走人. 至於今年收到嘅股息,目標係全數購入超過八厘股息嘅股票,產生良性循環,股票數量越多所收股息就會越多.真正做到滾雪球嘅效果. 


 最後講開股息,既然做到咁盡冇理由打九折都收貨,終於逼使自己的起心肝成為真正實名股東,今年兩期股息可以全數收齊,一毫子都冇少到真的很開心!不過將來企業變更改動股東事項就要自己搞掂可能會好麻煩. 另外就是缺乏靈活性,好似做定期一樣.鎖住一筆資金.最慘係睇住股價上上落落而自己不可以有任何操作,可能會好折磨. 自己坐定定唔喐同畀人綁手綁腳冇得喐動是兩回事.好睇自己性格同操作習慣,未必人人適合.

股民同股東雖然好似,但對投資企業的思考方式就有很大的分別,股民注重股價股東注重發展.另外一樣就係耐性,需要忍耐等待公司持續成長,希望將來成果倍增. 


 另外都提下.如果市場給予13~15倍PE我都覺得好合理,但係不動如山又唔會覺得出奇囉.雖然4G客戶已接近天花板, 但只要唔到退就可以保持收入穩定,5G客等到周圍朋友都換5G手機先至再關注都未遲.光纖服務就仲有一段路可以行.物聯網卡雖然銀碼細,但可以數量取勝,都可以幫補少少.不過唔知幾時先見到萬物互聯?至於數字經濟我就真係唔識,只要有人畀錢買佢嘅服務咁就好ok啦,雲服務應該有增無減,用開唔想轉,除非服務好差.重要數據梗係留返畀自己人做,而且增長勢頭都幾好,希望對收入比重可以逐步提升.要注意資本開支是否降低? 算力唔知使唔使燒錢投資?有算力有網絡加埋雲電腦,睇下可唔可以殺出條血路.經常簽訂合作協議,希望將來真係有成果啦.至於人民幣匯率,無能為力,知道高低就夠. 其實最簡單直接嘅方法就係令ARPU提升至60以上水平,不過唔知要等到何年何月先見到.如開綠燈就可以有一片新景象.加上5G射頻收發晶片破風,如果真的可以高良率量產,又可以多個新故事.增長動力是有的.就要睇下個餅可以做到有幾大. 到時可能變成增長股,到時估值又會唔同. 


  投資涉及風險請各位量力而為.一家大細等你養就更加要小心!!!盡量不要借錢投資,要相信慢即是快! 


 做完投資最緊要有三得: 食得...瞓得...屙得... 


 若無閒事掛心頭,便是人間好時節。 


人生哪能多如意,萬事只求半稱心。


 希望各位都能豐盛富足.


以上內容大家應抱有懷疑態度,是否小學雞作文為左認屎認屁.對於真金白銀投資就更加要提高警覺,就算身邊親戚朋友推介都要高度懷疑, 所有嘢未爆都是安全冇事的. 乜都唔使做就可以有”保證”高回報 ,真係有咁大隻蛤乸,太天真了!!! 最慘就連投資同投機都傻傻分不清. 賺硬錢嘅投資真係等你做...... 最低限度都要知道你賺緊邊d人嘅錢.


 免責聲明 

本網誌的內容純屬本人的個人意見, 並不構成任何投資建議,也不構成要約、招攬、邀請、誘使、建議或推薦,本人亦無法保證網誌內容的真確性和完整性。讀者一切的投資決定以及該投資決定引致的收益或損失或後果與本人無關,敬請留意.




2022年10月3日 星期一

財散人安樂

冇得手痕了,之前收到的股息已經全數再投資.

雖然之後仲有三筆股息收入,但需要慢慢用,用到明年6月.

下個月開始只可以每月買一手貨.keep住對股市嘅觸覺.


之前組合為分散而分散,但出面世界立立亂睇唔好前景,結果變成波段操作贏粒糖.

之後又再集中投資,得返七隻股票.


仲有就係原本想換股操作,但自己啲股票隻隻都跌到有8~9厘息,換嚟換去都冇乜用.


今年股息繼續創新高,超出預期.最開心係可以增加股數.但一定幫補唔到股價下跌.

睇返自己啲股數就真係好滿意.知道自己一向轉身唔夠快,習慣咗硬食.

"股票沽完貨後低位再入返"我自己就操作得好唔舒服,冇乜貨喺手個心就囉囉攣,跌得唔多又會再入返,反而影響心情,損害精神健康........無謂


2022年3月15日 星期二

冇錢了

 資金用完,只夠錢買一包花生食.坐定定睇埋下半場!

股票換碼,加返少少高息股.


股票倉沒有新經濟股,所以傷亡不算慘重.


各位網友保重身體,最重要瞓得安樂,量力而為 !!


2021年12月1日 星期三

調整組合佔比

 收埋最後一期股息,成績都好滿意,希望明年繼續保持創新高!!


下半年開始投資風格有啲改變, 因為見到新世界拆樓,維他........奶嘢,都給我小小提示,身邊一定有豬隊友, 到後來教育股收檔,吹水玩鬥地主,都令我覺得一定要改改原本嘅集中投資.


大圍齊齊跌,我會好開心好樂意接貨,但如果個別股票或整個板塊因某一事件大插水,當下真的冇嘢做到 . 唯有硬食一棍.


覺得自己心態已經改變,保本為前提, 增值放後面.


初期已經將5間公司股票增加到11間. 懶懶閑入得少少貨作貨底,但今年下半年就要開turbo入貨,希望未來三四個月可以完成將主力股分配到其他股票上.


心態上已經輸唔起,亦唔應該俾機會自己大輸。


投資理財需要平穩升值,風險可控。

贏少D好過輸鑊金!

自己搏殺期已經過咗,守住份本金先為上策 !!


2020年12月5日 星期六

紀錄係用嚟破

今年真係大開眼界,滙豐彈弓手。美股熔斷再熔斷,期油負數,螞蟻煞停,美國選總統……美股又GOGOGO,真係估你唔到。


而今年自己都有一樣突破就係收股息創新高。
現時講收息股真係有啲心虛。因為新經濟股表現得超強。
不過自我感覺良好。因為這個股票倉已經有5、6年沒有注入新資金,靠企業派息同股票轉換來增加現金流,睇住股票倉慢慢成長,所以值得記錄一下。

但暫時有部分係賺息蝕價。點都好總算收回部分成本。可以降低成本同有現金流入總算係好事又可以再入貨增加股數。

明年目標都係只得一個→增加股票數量。

2020年3月13日 星期五

精彩

可以見證美股大跌真係直得紀錄。

自己是08金融海嘯後先開始進入股市。
終於可以親身體驗持貨時對於股價大跌嘅感受。並不可怕還有些少興奮刺激。

見到股價大平賣真的很難忍手。

投資是有風險嘅。請各位量力而為。

最不想的事情發生了。今早使用了部份生活現金入市。仲可以入多一次就要收手喇。

當然提取嘅現金唔會影響我未來一年多嘅生活開支。
要用換股來優化組合是最後一步。因為要有好大嘅勝率我先至會行動。

投資最緊要知道自己在做什麼。風險有多大。衹要接受到就可以。


目標股票已儲夠數量心滿意足。
可以專心等業績睇報告。

股市波動不是風險。最重要知道自己嘅資產可否回升不要造成永久損失。

賬面虧損衹是數字遊戲。不要太注重。
冬眠過後春天又會來臨。循環不息。

2020年3月12日 星期四

機會嚟喇,飛雲!!

有準備嘅人先至可以捉緊機會。
自己又點呢???

我以為自己彈藥都算充足。但估唔到同醫院口罩一樣要用時急劇增加數量。彈藥所剩無幾。
好像今天那樣。昨晚預先排隊買口罩。因為知道🌷🏁銀行朝頭早一定死機不能交易。結果都使咗十幾萬嚟買口罩。彈藥用得超快超出想像。我排隊時已經降低3-4%,又俾我入到貨呵呵。

之前仲以為股市是平行時空兩個世界。
我懷疑自己點解股市1月2月跌得咁少。針唔拮到肉唔知痛。病毒未殺到唔知驚。
現時總算正常下跌。
現時下跌好正常。衹是要檢討自己點解會冇現金增持股票。

沒有恐懼祇有貪婪但冇錢入。
再有特價貨時只可以以物易物換碼。

現時每晚都11點訓覺。身心都算健康正常。

最後希望各位朋友可以開心購物。
大減價有錢唔入貨就笨喇。
希望大家好似搶廁紙那樣儲存很多股票數量。
但最緊要是夜晚可以一覺瞓天光,恭喜。

2019年10月1日 星期二

存股12年


最初存股衹是希望收息比定期多.高股息率可以幫補股價,就算股價跌都比較安心.
當中有股價股息兼賺,有賺息蝕價,當然也有雙輸.

到現在已經唔太注重高息股,要以成長型公司為目標。股息率一般都可以。最重要喺公司未來發展,是否可以長期生存的公司。

收咗咁多年股息今年終於累積超過100萬,值得記錄。

持有企業已經集中在只有五間。只希望企業業績平穩發展。

存股票最重要都係就算股價跌你都瞓得好安樂好安心。

2018年7月3日 星期二

好硬淨,失望!未夠恐慌!


想入嘅股票跌得太少,排隊等入貨。
大大力插多嘢就最好。

始終唔夠耐性等待,現金比例太少,搞到有選擇困難症。失敗。

2018年2月9日 星期五

全力專注公司基本面

股市升升跌跌好正常 
全世界嘅人都繼續生活
公司繼續為我賺錢
所以瞓得好安樂
努力睇業績報告


2017年11月7日 星期二

股市升但唔開心

繼續排隊等入貨,睇下執唔執到死雞.

保持一定數量資金,較有安全感.

今年收息都有十萬要繼續保持落去.

最低目標平均每月有一萬蚊股息收入.

要達到目標應該冇問題.

都係嗰句繼續增加有現金流的資產.

2016年12月25日 星期日

修改

今年下半年股票組合都有好大嘅改變.
加入好多新成員,比重方面都有好大變化.
現時著重防守,
希望未來一兩個月有機會入多啲貨,
只怕未來啲錢唔夠分配


2月$910.00
4月$1,076.00
$1,734.00
5月$3,130.50
$5,267.00
$3,060.00
$1,101.90
$3,010.00
6月$9,450.10
$90.00
$17,671.00
7月$4,037.64
$5,756.10
$10,479.36
$8,875.40
8月$450.00
$3,684.48
$1,165.20
$961.20
9月$4,425.00
$1,790.00
10月$690.00
$2,836.50
$636.00
$1,074.00
$1,173.00
$90.00
$5,435.00
$600.00
11月$5,054.00
12月$528.75
TOTAL:$106243


持續收集有現金流增長的資產!!!

08~16年總收入
08年  $1990
09年  $36949
10年  $81119 + 股  $1332 
11年  $107236
12年  $77536 + 股  $790
13年  $114761
14年  $72999 
15年  $157027
16年  $106243
----------------------------------
    共 $ 755860 +股  $2122










2016年12月15日 星期四

老人的心裡話

以下是老人的心裡話,看看:
孩子,當我老了,希望做兒女的不要嫌棄我。現在我需要照顧了,就如你小的時候,我照顧你那樣,請對我多一些耐心。
當我老了,手經常發抖,吃飯時常把菜湯灑在衣服上,別嫌棄我,對我多一些耐心,就如你小時候,吃飯也經常把菜湯灑在衣服上一樣。
當我老了,走路蹣跚行動不便,也想出去曬曬太陽,就如你小時候,我用小車推著你出去曬太陽一樣。
當我老了,說話時常忘記了說到哪裡,於是我把話再從頭說一遍,請多給我一些時間,讓我好好想想,然後把我沒有說完的話再繼續說完。其實我談論什麼並不重要,請多一些耐心待我。
當我老了,每當夜晚,我一遍又遍地重複你早已聽膩的話時,希望你不要打斷我的思路,就像你小時候,我給你講上百遍小白兔的故事,直到你微笑著進入夢鄉。
老人的一生就這樣忙忙碌碌地走過了,老來希望兒女能多一些耐心,少一些煩躁對待他們。因為在不久的將來,我們也會慢慢變老的,也會像老人一樣,希望兒女們對我們好的。